हेटौंडाको नवोदय बोर्डिङको ब्रम्हलुट, मनलाग्दी शुल्क असुली, हेरेरै मात्र बस्छ स्थानीय सरकार

हेटौडा खबर आइतवार, २०८१ साउन २०, २१ :५१ बजे

संभवत हेटौंडाकै सबैभन्दा ठुलो र महङ्गो निजी विद्यालयमा पर्छ नवोदय शिशु सदन अंग्रेजी माध्यमिक विद्यालय ।

हेटौंडा-४ मा रहेको यो विद्यालयमा अलि हुनेखाने वर्गका छोराछोरीले आफ्ना बालबालिका पढाउने गर्छन् । सम्मान्य तथा निम्न आए हुने अभिभावकले आफ्ना बच्चा यस स्कुलमा पढाउन सक्दैनन् । विद्यालयमा हेटौंडामा नाम कहलिएका शिक्षा सेवीको उपमा पाएका पुरण बहादुर जोशीको लगानी रहेको छ । नवोदयमा आफ्ना बच्चा भर्ना गर्न जो कोहीले पनि एकपल्ट सोच्नुपर्छ । सामान्य नोकरी र सामान्य जिविकोपार्जन गर्ने व्यक्तिले यस विद्यालयमा बच्चा भर्ना गर्ने सक्दैनन् ।

तर नियामक निकायले अनुगमन र उचित नियमन नगर्दा यस विद्यालयको मनलाग्दी यतिसम्म बढेको छ कि अहिले हुनेखाने वर्गले समेत यहाँ आफ्ना बालबालिका पढाउन धौधौ भएको छ । अत्याधिक भर्ना शुल्क र विभिन्न शिर्षकको माशिक शुल्कले यस विद्यालयले अभिभावकको ढाड सक्ने गरेको छ । हुनत निजी लगानीमा संचालित विद्यालयले आफ्नो ढंगले शिक्षण सिकाईको व्यवस्थापन र सोही अनुसारको शुल्क लिन सक्छ तर हदै सम्मको असुली धन्दा भने कसैले पनि गर्न पाउदैन । यहाँ भने नवोदयले राज्यको नियम कानुन र मापदण्डलाई लात हान्दै मनोमानी गरिरहेको छ ।

हेटौंडा शिक्षा ऐनको त कुरै छाडौं यस विद्यालयले अत्याधिक शुल्क असुलेर अभिभावकलाई हैरान बनाएको छ । विद्यालयमा आफ्ना बच्चा भर्ना गर्दा अभिभावकले आधालाख रुपैयाँ सुरुमै विद्यालयलाई चढाउनु पर्छ । त्यती मात्र होइन हरेक हप्ता अनेक कार्यक्रम र शिक्षण सिकाईका नाममा अभिभावकबाटै थप शुल्क र अनेक जिन्सी सामान खरिद गर्न लगाउछ विद्यालयले ।

हेटौंडा उपमहानगरपालिकाको शिक्षा ऐन २०७४ को दफा २८ को उपदफा ५ मा ‘विद्यालयले विद्यार्थीलाई कुनै कक्षामा भर्ना गर्दा एक पटक भर्ना लिईसकेपछी पुनः सोही विद्यालयले अर्को कक्षा भर्ना गर्नको लागि अन्य कुनै शुल्क लिन पाउने छैन’ भन्ने उल्लेख छ । तर उक्त प्रावधानविपरित यस विद्यालयले अन्य शिर्षक राखी चर्को शुल्क असुलेको छ । नवोदयले नर्सरी कक्षामा पढ्ने विद्यार्थी उपल्लो कक्षामा जाँदा एनुअल फी को नाममा १८ हजार बढी रकम असुल्ने गरेको छ भने त्यसभन्दा माथिकालाई सोही अनुसारले अत्याधिक बढी रकम लिने गरेको छ ।

विद्यालयले भर्ना गर्ने बेला चर्को शुल्क लिने गरेपछी आफुहरु मारमा परेको अभिभावकले गुनासो गरेका छन् । नियममा शुल्क निल नपाउने भएपनि विद्यालयले भर्ना गर्ने बेला अनेक शिर्षक राखेर रकम असुल्ने गर्दा अभिभावकलाई समस्या भएको भन्दै रकम फिर्ता गर्नुपर्ने अभिभावकहरुको माग छ ।

‘अब हाम्रो बच्चा पढाउन नसकिने भैयो, हरेक वर्ष स्कुलले अनेक शिर्षकमा बिल पठाउछ २ कक्षाको बच्चालाई आधालाख जति भर्ना गर्न लाग्छ’, हेटौंडा-४ का एक अभिभावकले गुनासो गरे ।

यसरी हरेक वर्ष नवोदय स्कूलले अभिभावकलाई ठगिरहदा सम्बन्धित निकाय भने मौन बस्ने गरेको छ । हेटौंडाका विद्यालय वर्गीकरण गर्ने र विभिन्न शिर्षकमा उठाएका रकम माशिक शुल्कमा समायोजन गर्ने बताएको हेटौंडा उपमहानगरपालिकाले यहाँका निजी विद्यालयको ठगी धन्दा देखेनदेखे झैँ गरेको छ । जसको मारमा आम अभिभावक परेका छन् । आफ्नै नियम र कानुनलाई लात्याउदासमेत यहाँका निजी विद्यालयलाई हेटौंडा उपमहानगरपालिकाले कारबाहीको दायरामा ल्याउन सकेको छैन ।

अभिभावक संघको आपत्ती

हेटौंडाका निजी विद्यालयले शिर्षक परिवर्तन गरेर वर्षैपिच्छे अभिभावकक संग चर्को रकम असुल्दासमेत स्थानीय सरकारले कुनै चासो नदिनु दुखद भएको अभिभावक संघको धारणा छ । संघले पटकपटक आवाज उठाउदासमेत अनुगमन नगर्ने र अनुगमन गरेपनि विद्यालयका संचालकलाई लिएर अनुगमनमा निस्किने गरेकाले अभिभावक मारमा पर्ने गरेको संघकी जिल्ला अध्यक्ष रमिला सापकोटाले बताइन् ।

‘यसमा हाम्रो गम्भीर आपत्ति छ, हामीले पटकपटक घच्घच्याउने काम गर्दासमेत स्थानीय सरकारले बेवास्ता गरेको छ । ‘स्कुल संचालकसंग नजिक भएकाले उहाहरु प्याब्सन बोकेर अनुगमनमा निस्किनु हुन्छ सम्बन्धित निकायले कुनै चासो नदिएकाले अभिभावक मारमा परेका हुन्’, उनले भनिन् ।

यो विषयमा तत्काल अनुगमन गरेर विद्यालयले शिर्षक परिवर्तन गरेर लिएको चर्को शुल्क फिर्ता गराउनुपर्ने उनले बताइन् ।

यो पनि पढ्नुहोस् ।