हेटौंडामा दशैँमा बनाइएको खसी बजार अव्यवस्थित, गेटमा ताला, किसानले कर तिर्छन् तर खसी राख्न पाएनन्
बागमती प्रदेश सरकारको १५ लाख बजेटबाट निर्मित हेटौंडाको खसी बजार उद्घाटन गरिएको एकहप्तामै भद्रगोल बनेको छ ।
अव्यवस्थित खसी बजारलाई व्यवस्थित गर्न प्रदेश सरकारको लगानीमा हेटौंडा उपमहानगरपालिकाले समन्वय गरी बनाएको खसी बजार झन् अव्यवस्थित र असुरक्षित भएको भन्दै ब्यापारी आक्रोशित बनेका छन् ।
हेटौंडा–१ चौकीटोलस्थित झोलुङ्गे पुलमुनी निर्माण गरिएको खसी बजार गत असोझ ३० गते उद्घाटन गरिएको थियो दशैँको मुखैमा हेटौंडा बसपार्कबाट चौकीटोल सारिएको खसीबजार अव्यवस्थित भएपछि किसान तथा ब्यापारी आक्रोशित बनेका हुन् । खसीबजारमा हेटौंडा उपमहानगरपालिकाले कर संकलन गर्न ठेक्कासमेत दिएको छ । ठेकेदारले उपमहानगरपालिकालाई वार्षिक रुपमा ७ लाख ३७ हजार ६९ रुपैंया बुझाउने गरेको छ भने खसी उक्त बजारमा ल्याएपछी प्रति खसी/बोका २५ रुपैंयाका दरले किसान तथा ब्यापारीले कर संकलकलाई रकम बुझाउनु पर्नेछ ।
तर भर्खरै निर्माण गरिएको खसीबजारमा किसानले खसी राख्न पाएका छैनन् । ३० गते उद्घाटन गरेर दशैंको फूलपातीको दिनसम्म खसीबाजारको गेट खुलेको र त्यसयता ताला लगाइएको ब्यापारीले बताएका छन् । बजार भनिएकै ठाउँको गेटमा ताला लगाएपछि खसी बोका बिक्रि गर्न समस्या भएको उनीहरुको गुनासो छ ।
हेटौंडा उपमहानगरपालिकाले २५ रुपैंयाका दरले कर लिन्छ, हामि बाहिरै बस्नु परेको छ, ताला लगाएको छ जंगलको कुनामा ग्राहक नै आउदैनन्, उपमहानगरपालिकाले हामीलाई पशुको व्यवहार गर्यो,’ मकवानपुर गढी गाउँपालिकाबाट खसी बेच्न आएका एक किसानले भने, ।
पोहोर एक सय ओटा खसी बेचेको तर यसपाली खोलाको छेउमा कोही ग्राहक नआएकाले ५० वटा पनि बिक्रि नभएको र आउन जानसमेत अप्ठेरो भएकाले आफुहरुलाई समस्या भएको खसी बेच्न आएका ससी देवकोटाले बताए ।
दशैको बेला व्यवस्थित गर्ने नाममा खसी बजार झन् भद्रगोल बनाएको र किसान तथा ब्यापारीलाई हेटौंडा उपमहानगरपालिकाले मर्कामा पारेको खसी व्यापारीको आरोप छ ।
खसी किन्न आउनेले पनि हाल बनाइएको खसी बजार अपायक भएको र अव्यवस्थित भएको गुनासो गर्ने गरेका छन् ।
उता हेटौंडा उपमहानगरपालिकाले भने खसीबजार सोही स्थानमा पायक रहेको र थप व्यवस्थित बनाउने तयारी गरिरहेको बताएको छ । भर्खरै उद्घाटन गरिएकाले केही समस्या देखिएपनि उपमहानगरपालिकाले खसी बजार व्यवस्थित बनाउने हेटौंडा उपमहानगरपालिकाका प्रवक्ता सविन न्यौपानेले बताए ।
‘ब्यापारी तथा किसान र ग्राहकलाई सजिलो हुनेगरी थप व्यवस्थित बनाउने तयारिमा छौं, टाढाबाट आएका ब्यापारीले खसी त्यही राख्न मिल्ने गरी संरचना बनाउछौं, नगर प्रहरी खटाइसकेका छौं’, प्रवक्ता न्यौपानेले भने, ।
क्याटेगोरी : मुख्य खबर, समाचार, स्थानिय
प्रतिक्रिया