हेटौंडामा हाम्रो नेपाली पार्टीका उम्मेदवार दिपेन्द्र ठकुरी समूहको गुण्डागर्दी, टेलिभिजन कार्यक्रममा अवरोध
हिमालय टेलिभिजनले हेटौंडामा आयोजना गरेको निर्वाचन महासंग्राम बहस कार्यक्रममा हाम्रो नेपाली पार्टीका उम्मेदवारहरुले टेलिभिजन समूह र अतिथिहरुमाथि अभद्र व्यवहार गरेका छन् ।
आफुलाई मञ्चमा नराखेको भन्दै प्रतिनिधि सभा सदस्यमा मकवानपुरको निर्वाचन क्षेत्र नम्बर १ बाट उम्मेदवारी दिएका दिपेन्द्र चन्द ठकुरी र मकवानपुरको निर्वाचन क्षेत्र नम्बर १ को ‘ख’ बाट प्रदेश सभा सदस्यमा उम्मेदवारी दिएका किशोर अर्यालसहितको समूहले कार्यक्रममा अवरोध गरेका हुन् । अभिव्यक्ति स्वतन्त्रता र प्रेस स्वतन्त्रतामाथि समेत अवरोध हुने गरी ठकुरीको समूहले दुर्व्यवहार गरेको हो ।
प्रत्यक्ष प्रसारण भैरहेका बेला ठकुरी र उनका समर्थकले आफुलाई मन्चमा नराखेको भन्दै नारावाजीमा उत्रिएका थिए ।
कार्यक्रम प्रस्तोता बानियाँले सहभागी सबै दलका नेता, उम्मेदवार र सहभागीलाई बोल्ने अवसर दिइने बताएका थिए । तर प्रस्तोताको आग्रहलाई बेवास्ता गर्दै ठकुरीसँगै अर्याल र उनीहरुका समर्थकले अवरोध जारी राखे । उनीहरुको अवरोधकै कारण करिब ९ मिनेटपछि प्रत्यक्ष प्रसारण नै रोकेर कार्यक्रम स्थगित गरिएको थियो ।
ठकुरीले टेलिभिजन कार्यक्रम अवरोध गर्नुका साथै गम्भीर आरोप समेत लगाएका छन् । हिमालय टेलिभिजन र टेलिभिजनमा आवद्ध पत्रकारले लाखौं रुपैयाँ लिएर सीमित उम्मेदवार र पार्टीका नेतालाई मात्रै बहसमा सहभागी हुन अवसर दिएको ठकुरीले आरोप लगााएका छन् । दलाल पत्रकारिता, निरंकुश पत्रकारिता भएको भन्दै ठकुरीले लाखौं रकम लिएको आरोप लगााएका छन् ।
हेटौंडामा ठकुरीलगायतका समुह दलको उम्मेदवार भएपनि मतदातालाई प्रभावित पार्न स्वतन्त्र उम्मेदवार भन्दै चुनावी प्रचारमा छ । गएको स्थानीय तह निर्वाचनमा स्वतन्त्र उम्मेदवारी दिएर लौरो चिन्हबाट काठमाडौं महानगरपालिकामा बालेन्द्र साह र धरान उपमहागरपालिकामा हर्क साम्पाङ निर्वाचित भएको पृष्ठभूमिमा ठकुरी र अर्यालले सामाजिक सञ्जालमा आफ्नो पार्टीको लौरो चुनाव चिन्ह मात्रै राखेर राजनीतिक दलको नाम भने उल्लेख नगरी नागरिकलाई स्वतन्त्र हुँ भन्ने भ्रम छर्दै मतदातालाई प्रभावित पार्ने गरेका छन् ।
क्याटेगोरी : मुख्य खबर, समाचार, स्थानिय
ट्याग : #आमनिर्वाचन, #गुण्डागर्दी, #दिपेन्द्र ठकुरी, #हिमालय टेलिभिजन
प्रतिक्रिया