हेटौंडाको ज्ञानोदय विद्यालमा गायन प्रतियोगिता, नवोदयका चिराग प्रथम
हेटौंडा–५ मा रहेको ज्ञानोदय बालवाटिका आवासीय विद्यालयको आयोजनामा भएको विद्यालयस्तरीय एकल गायन प्रतियोगितामा नवोदय शिशु सदन विद्यालयका चिराग डंगोल प्रथम भएका छन् ।
१३ जना प्रतिस्पर्धीलाई पछि पार्दै डंगोल प्रथम भएका हुन् । प्रतियोगितामा हेटौंडा–२ स्थित बालजागृति इंग्लिस सेकेण्डरी विद्यालयका सुजैना गहतराज द्वितीय, ज्ञानोदय बालवाटिका आवासीय विद्यालयकी आयुष्मा उप्रेती तृतीय भएको प्रतियोगिताका निर्णायक पूर्णविक्रम अधिकारीले जानकारी दिए ।
प्रतियोगितामा बालज्योति माविकी सुनिता बल, जेम्स विद्यालयका जेनिशा बर्तौला र मनहरी गाउँपालिकाको युनाइटेड बोर्डिङ स्कूलका शोभित खड्का सान्त्वना भएका छन् । प्रतियोगितामा प्रथम, द्वितीय, तृतीय र सान्त्वना हुने विद्यार्थीले क्रमश : नगद ७ हजार, ५ हजार, ३ हजार र १ हजार रुपैयाँसहित प्रमाणपत्र प्राप्त गरे । भीम विरागको स्मृतिमा विद्यालयले पहिलो पटक गायन प्रतियोगिताको आयोजना गरेको हो । प्रतियोगितामा गायक कृष्णगोपाल सिंह र म्युजिक कम्पोजर पूर्णविक्रम अधिकारीले निर्णायकको भूमिका निर्वाह गरेका थिए ।
ज्ञानोदय बालवाटिका आवासीय विद्यालयका प्रिन्सिपल श्याम कुमार बानियाँले गायन प्रतियोगितालाई हरेक वर्ष आयोजना गरिने बताए । विद्यालयका प्रिन्सिपल बानियाँको अध्यक्षता तथा प्याब्सन बागमती प्रदेश समितिका अध्यक्ष केशवलाल श्रेष्ठको प्रमुख आतिथ्यमा उद्घाटन कार्यक्रम भएको हो । कार्यक्रममा वडा अध्यक्ष सुशील घिमिरे, भीम विराग संगीत, साहित्य, कला प्रतिष्ठानका अध्यक्ष ह्यग्रीव आचार्यलगायतको आतिथ्यता रहेको थियो ।
क्याटेगोरी : मुख्य खबर, समाचार, स्थानिय
प्रतिक्रिया